Kvöldstund

Kom við í uppáhalds bakaríinu okkur á leiðinni heim af bókasafninu í dag og keypti franska brauð stöng með kvöldmatnum. Kom við í kjörbúðinni og keypti tómata sem ég gleymdi að kaupa á markaðnum í morgun. Kom heim og helti tilbúnu súpunni í pott sem varð heit á svipstundu, tilbúin að seðja sárt hungur mannsins míns sem kom heim tíu mínútum seinna. Var hugsað til kvenna í eyðimörkum miðausturlanda sem hefðu staðið í ímyndaði ég mér minst 3 tíma að sjóða, stappa og mauka grænmetið í súpurnar sínar. Ég dró að mér andann og þakkaði Knorr í huganum.

Meðan við borðuðum súpuna lágu nýskoluðu fersku hörpuskelfiskarnir frá Normandie sem Marwan keypti af einhverjum í vinnunni í sigtinu frami í eldhúsi og létu dropa af sér.

Kvöldmaturinn var yndislegur. Hvítur fiskur ættaður frá Tælandi, hörpuskelsfiskarnir framangreindu mallað í rólegheitum í lauk, hvítlauk og tómötum. Basmati hrísgrjón með og nóg af Volvic vatni sem minnir mig svo á íslenska vatnið.

Ostar, miðausturlenskt sætabrauð, grænt te með mintu ... horfðum á 2 þætti af húsmæðrunum örvæntingafullu.

Á morgun leysi ég af í afgreiðslunni á hótelinu frá átta til átta. Vakna klukkan sjö og hita mér te horfandi út í rökkrið fyrir utan eldhúsgluggann. Sólin kemur ekki upp fyrr en rétt eftir átta þessa dagana.